Astronomía na beirarrúa

Estamos no "Face"

2010-05-19T17:12:00.003+02:00

Podes seguir tamén as nosas novas en Facebook.

http://www.facebook.com/Astronomia.na.beirarrua

Compartindo xeografías e historias do ceo

2010-05-19T17:04:00.006+02:00

Onte, espléndida noite e magnífica compañía nos arredores da Facultade de Filoloxía da USC. Astrónom@s na beirarrúa e Astrofilólog@s compartindo xeografías e historias do ceo. Cinco horas sen parar e con ganas de repetir.

Parabéns á Sección Galega da SEEC por esta iniciativa!

(Foto de Josué Neira)

O martes 18 de maio, na Fac. de Filoloxía da USC

2010-05-14T22:53:00.005+02:00

Este martes 18 de maio, a partir das 21.30h, estaremos na Facultade de Filoloxia da USC para desfrutar dos ceos co estudantado e o profesorado do centro. É unha actividade coorganizada cos amigos e amigas da Sección Galega da SEEC, a xente que máis e mellor coñece as historias míticas tecidas en Grecia e Roma arredor das nosas constelacións.
A nova na prensa: clic aquí.

Feira da primavera 2010 no Barrio de San Pedro

2010-04-30T17:10:00.004+02:00

O sábado 8 de Maio estaremos cos telescopios de Astronomía na beirarrúa na Feira da Primavera do Barrio de San Pedro, en Compostela... Achegádevos a pasar o día no barrio! Montaremos os telescopios á tardiña. Estades tod@s convidad@s!
Entre outras cousas desfrutaredes da
- Charanga Trópico de grelos
- Cé orquestra pantasma
- A caixa de Tambora
- Cabaret de Novo Circo
- Sound System
- Astronomía na Beirarrúa e...
- ás 22:00 os Mordecáns en concerto.

AstroGalicia-2010

2010-04-30T17:00:00.006+02:00

AstroGalicia é a Festa da Astronomía Galega, e xa vai pola súa terceira edición: Obradoiros, charlas, observacións e mil cousas máis, ademais dun agradábel espazo de encontro para todas as persoas que desfrutamos do ceo. Este ano terá lugar os días 10, 11 e 12 de Setembro, no concello de Boimorto, moi perto de Compostela. Anímate a participar! O periodo de preinscrición xa está aberto. Toda a información en http://www.astrogalicia.org/

Paremos a Contaminación Lumínica !

2010-03-24T18:01:00.010+01:00

Recentemente saiu publicado no número 129 da revista AstronomiA un interesantísimo artigo de Carlos Herranz (presidente de Cel Fosc, asociación contra a contaminación lumínica) titulado "Hágase la luz: mitos y realidad en la protección del medio nocturno", cuxa lectura vos recomendamos.

Podedes baixar o pdf facendo clic nesta ligazón:
http://www.celfosc.org/biblio/general/herranz2010.pdf

.

Lista de correo do Clube de Astronomía "Vega"

2010-03-11T15:33:00.008+01:00

Algunhas das persoas que participaron nas observacións pedíronnos información sobre como estar ao día das actividades que organiza o Clube de Astronomía Vega, de Santiago de Compostela (saídas de observación, reunións mensuais, etc). O Clube de Astronomía Vega colabora coa Universidade de Santiago de Compostela no desenvolvemento do programa "Astronomía na beirarrúa"

Se desexas subscribirte dun xeito doado e rápido á súa lista de correo, aquí tes como facelo: pon o teu enderezo de correo na casiña e fai clic en "Yahoo! Groups Join now!".

Recibirás no teu correo instrucións de como completar a subscrición.

Efectivamente: vai frío!

2010-03-10T19:47:00.010+01:00

Onte comprobámolo de novo, coas e cos estudantes da USC que participan no programa "Astronomía na beirarrúa": ao facer observacións astronómicas no monte, vai frío. Moito frío.

O motivo évos ben sinxelo: a temperatura é baixa (uns poucos graos), estamos parados arredor dos telescopios durante moito tempo e non recibimos a luz e o calor do Sol. Se ademais vai vento, como ía onte, a sensación térmica é aínda de menor temperatura.

Que facer? Quedar na casa e perderse os preciosos ceos da invernía? Nin pensalo. A solución é sinxela: Roupa de abrigo en cantidades industriais (sempre é millor que sobre que que falte), e algo quente para tomar no medio da noite.

Hai quen pensa que a un/ha astrónomo/a se lle recoñece porque anda por aí cun telescopio. É certo, pero só a medias: A un/ha astrónomo/a se lle recoñece sobre todo porque leva un gorro posto na cabeza e vai ben abrigado/a!

Calendario Celeste de Marzo (Clube Vega)

2010-03-09T17:09:00.002+01:00

Os amigos e amigas do Clube de Astronomía Vega, de Santiago de Compostela, acaban de publicar o seu Calendario Celeste correspondente ao presente mes de Marzo. Ten unha chea de informacións interesantes para as persoas afeccionadas á observación do ceo.
Podes baixalo en pdf clicando aquí.

Obradoiro de manexo de telescopios

2010-03-06T20:31:00.003+01:00

O próximo martes 9 de marzo, a partir das 20.00h, estaremos na Escola de Óptica e Optometría da USC para facer un obradoiro de manexo de telescopios, con observación nocturna se o tempo acompaña, dirixido ás e aos estudantes da USC que participan no programa AnB-DoC ("Astronomía na beirarrúa / Descubre o ceo".
Xa nos tarda, logo dun dos invernos con máis noites de ceo cuberto dos últimos anos! :-)

Un regalo para os ollos

2009-12-14T17:38:00.007+01:00

Choveron estrelas sobre Galicia e o resto do mundo, nesta fría noite de invernía. Estrelas fugaces que por efecto de perspectiva parecían provir da constelación de Gemini (Os Xemelgos) e que nos deixaron unha das chuvias máis vistosas do ano.

Este foi tamén o estreo da C'MON! (Collaborative Meteor Observatory Network) a Rede Galega de Seguemento de Meteoros, formada por afeccionad@s e profesionais de toda Galicia. Estivemos durante toda a noite gravando as trazas que deixaban os meteoros coa intención de poder triangular para deteminar as súas traxectorias e, se cadra, aprender algo máis sobre as orixes do Sistema Solar.

Frío fixo abondo: na foto, unha imaxe de Pablo, da Asoc. Astronómica Rias Baixas, que montou a estación de observación no alto de Fontefria (e comprobou persoalmente o porqué dese nome :-)

Se queredes ver un video con trazas de 30 meteoros, gravado desde o barrio de San Pedro en Compostela, clicade aqui.

Se queredes ver dous preciosos videos "time lapse" desta pasada noite, non vos perdades o de Óscar, da Agrup. Astronómica Io da Coruña (clic aquí) e o de Xurxo, de CieloBarbanza (clic aquí). Desfrutádeos a pantalla completa... pagan a pena!!

Leónidas '09: a chuvia de estrelas quedou en orballo... :)

2009-11-18T20:39:00.008+01:00

Onte día 17 tivo lugar a chuvia de estrelas coñecida como "As Leónidas" porque por un efecto de perspectiva semellan saír da constelación de Leo, o león. Foi moito menos intensa do previsto, así que poucos foron os e as afortunadas en ver meteoros brillantes.

@s astrónom@s afeccionad@s galeg@s fixeron un importante esforzo para obter datos científicos sobre este evento, pero a noite en moitos lugares non acompañou. Iso, si, pasar pasámolo ben :) . E algunhas estrelas fugaces quedaron rexistradas polas cámaras: velaí unhas cantas obtidas polo noso colega Pablo Canedo, que ten unha longa experiencia gravando as cousas que acontecen no ceo: videos en youtube - vimeo

Estaremos atentos á seguinte chuvia, as Xemínidas (adiviñades o por que do nome? ;)) que terá lugar o próximo 14 de decembro.

Calendario Celeste, mes de novembro

2009-11-12T17:52:00.007+01:00

O Clube de Astronomía Vega, de Santiago de Compostela, acaba de publicar o seu calendario celeste do mes de Novembro. Se queres botarlle un ollo para saber que hai no ceo deste mes, podes baixalo en pdf clicando aquí.

Astrogalicia 2009

2009-09-10T21:05:00.007+02:00

Do 18 ao 20 de setembro, en Maceda, perto de Ourense, AstroGalicia-2009, a Festa da Astronomía Galega. Anímate a participar !!
http://www.astrogalicia.org/
Toda a información, e máis, clicando aquí.

Música e Estrelas nas Festas de Conxo

2009-09-06T19:26:00.007+02:00

Onte á noite música e estrelas na I Festa da Cabra do compostelán barrio de Conxo. Despois dun día g-astronómico, lembrando aquel Banquete de Conxo que tivo lugar no xa lonxano 1856, desfrutamos da noite na compaña da boa música dos grupos A Roda, Arrás e Tombalobos. Parabéns ás asociacións organizadoras, e saúdos aos amigos da Roda, algún dos cales tamén se achegou a botarlle un ollo ao ceo cos veciños e veciñas do barrio.

Festas da Rúa de Abaixo

2009-09-05T18:37:00.010+02:00

------------------------- Parabéns á Asociación veciñal "As Marías" e demais entidades que fan posíbeis as "afamadas e tradicionais festas da rua de baixo". Onte pasámolo fenomenal con eles, en especial c@s pequen@s do barrio, todas e todos uns astrónomos en potencia!
As festas desa rúa continuan hoxe... Non deixedes de ir!
AnB estará no barrio de Conxo.

E esta fin de semana... de novo en Compostela !

2009-09-02T19:57:00.007+02:00

AnB volta ás rúas compostelás!

Este venres día 4 estaremos nas festas que organiza a Asociación veciñal "As Marías", en colaboración coas entidades do barrio, na Rúa de Abaixo (rúa do espírito santo)

E o sábado día 5, na I Festa da Cabra, no barrio de Conxo, organizada pola Asociación de Veciños de Conxo Doutor Maceira, a A. VV. da Rocha e a Asociación Cultural A Rocha Forte. A partir das 20h ou así xa nos veredes por alí... Festas e G-Astronomía na finde!

Descubrindo o Universo, na Pobra

2009-08-31T00:08:00.004+02:00

A actividade convocada por "Cielobarbanza" para o pasado sábado día 29 foi todo un éxito.
Centos de veciñas e veciños da Pobra do Caramiñal e persoas que visitaban a vila achegáronse até a praza na que estaban instalados máis de vintecinco telescopios e acompañáronnos até ben pasadas as dúas da madrugada. A Lúa, Xúpiter, a preciosa estrela dobre Albireo e a galaxia de Andrómeda foron os protagonistas da noite.

Participaron na convocatoria asociacións de astrónom@s afeccionad@s de toda Galiza.

Imaxe: instalando os telescopios á tardiña.

27 de agosto: Marte do mesmo tamaño que a Lúa?

2009-08-22T16:20:00.006+02:00

Desde o ano 2003 circula periodicamente pola rede un correo lixo anunciando que na noite do 27 de agosto Marte vai estar tan perto da Terra que se poderá ver a simple vista co tamaño da Lúa chea. Por desgraza e por fortuna, é un bulo sen fundamento. Por desgraza, porque certamente sería un espectáculo precioso, se fose posíbel, que non o é. Por fortuna, porque se Marte estivese tan perto da Terra como para velo sen telescopio dese tamaño, os efectos de marea rematarian probabelmente con todos nós.

Se vos chega un correo anunciando este "fenómeno" non o reenviedes. É puro spam. Quen queirades saber máis sobre a orixe deste fraude, botádelle un ollo ás interesantes páxinas:

- Marte com o mesmo diâmetro aparente da Lua? (Ciência Viva, PT)
- The Mars hoax (Wiki-EN)
- Mars Hoax Returns (Sky and Telescope-EN)

Desfrutade dos preciosos ceos de verán e animádevos a participar nalgúns dos encontros e noites de estrelas que se están a calebrar por toda Galiza! O próximo, o sábado 29 de agosto na Pobra do Caramiñal (máis info noutro post deste blog)

E o sábado 29... na Pobra do Caramiñal !

2009-08-16T17:46:00.006+02:00

Convocada pola asociación Cielobarbanza, o sábado 29 de agosto terá lugar na Praza Maior da Pobra do Caramiñal unha xornada para celebrar o Ano Internacional da Astronomía.

Pola mañá haberá observacións do Sol entre as 11h e as 13h, e xa pola noite, de 22h a 02h, haberá proxeccións, charlas, sorteos de planisferios e unha observación do ceo para todas as persoas que o desexen, utilizando os telescopios que alí montará Cielobarbanza coa participación de telescopios de toda Galiza.

Para ver toda a información fai clic aqui.

Pásate por alí!

Xuntanza de Telescopios en Ourense

2009-08-16T17:26:00.006+02:00

(Foto da web do diario "La Región")

A Xuntanza de Telescopios na noite do pasado día 13 na Alamenda de Ourense convocada pola asociación Ourense Astronómico foi todo un éxito.

Coa participación de afeccionados de varias localidades galegas, estivemos até ben pasada a medianoite desfrutando do que o ceo nos ofrecía: o que máis chamou a atención foi Xúpiter, doadamente visíbel este mes desde primeiras horas da noite no horizonte Leste.

Parabéns e grazas aos convocantes, polo ben que o pasamos, e tamén á Banda Municipal ourensá, porque non che nada hai como ver o ceo acompañados por boa música...

As novas en "La Región":
- Presentación
- O día da actividade

Choven estrelas

2009-08-10T15:17:00.002+02:00

Esta semana tedes dúas convocatorias interesantes:

- O mércores 12 o Clube de Astronomía "Vega" organiza unha quedada para ver a chuvia de estrelas coñecida como "as bágoas de San Lourenzo" (Perseidas). Será a partir das 22h no compostelán parque de Belvís. Colabora o Concello de Santiago.

- E se andas por terras ourensás, non cho perdas: o xoves 13 a Asociación "Ourense Astronómico" ten convocada unha Concentración de Telescopios de toda Galiza, na Alameda de Ourense, coa colaboración das concellarías de Xuventude e Cultura. A partir das 19.30 haberá unha exposición de astrofotografía e en canto anoiteza, aló polas 22h, os telescopios estarán a disposición das veciñas e veciños que desexen contemplar o precioso ceo de verán.

AnB nas FESTAS DO BARRIO DE SAN PEDRO

2009-06-17T21:11:00.002+02:00

Xa están aquí as Festas do Barrio de San Pedro ! Do 24 ao 28 de xuño, un interesantísimo programa de actividades que podedes ver en http://www.fbsp.info/

Como xa é tradición, andaremos por alí cos telescopios de AnB para desfrutar do ceo con todas as persoas que nos visiten... Será na tardiña do sábado 27. O programa ten opcións para todos os gustos... VISITA SAN PEDRO ! :-)

ASTROGALICIA 2009

2009-06-16T18:20:00.009+02:00

Do 18 ao 20 de setembro terá lugar en Maceda (Ourense) Astrogalicia, a principal xuntanza aberta promovida pol@s astrónom@s afeccionad@s galeg@s.

A súa páxina web acaba de facerse pública. Non deixes de consultala e... anímate a participar ! http://www.astrogalicia.org/

Fragmento da presentación:

"Programa de actividades aberto a todos os interesados no mundo da astronomía. Neste Ano Internacional da Astronomía 2009, os astrónomos afeccionados galegos queremos invitar a toda a poboación a achegarse a esta ciencia.

A desenvolver entre o 18 e o 20 de setembro de 2009 na vila ourensá de Maceda. Moitas das actividades serán abertas, como as observacións públicas.

Calquera interesado ou afeccionado pode anotarse. Preparamos varios grupos de traballo para aqueles que se queiran iniciar na astronomía, pero tamén para aqueles que desexen afondar na astrofotografía. Así, cada inscrito poderá escoller o itinerario formativo que mellor se acomode aos seus intereses (...)."

I ENCONTRO ASTRONÓMICO DA FC3: "DA TEORÍA Á PRÁCTICA NO OAF (Observatorio Astronómico de Forcarei)"

2009-06-15T18:18:00.002+02:00

Recibimos esta interesante información dos nosos colegas da FC3:

A Fundación Ceo, Ciencia e Cultura (FC3) organiza o I ENCONTRO ASTRONÓMICO DA FC3: "DA TEORÍA Á PRÁCTICA NO OAF (Observatorio Astronómico de Forcarei)" que terá lugar en Forcarei --Centro Social e Observatorio Astronómico-- do 25 ao 28 de xuño.

-CURSO DE 30 HORAS LECTIVAS EN TOTAL
-AS LECCIÓNS MAXISTRAIS INCLUIRÁN UNHA PROPORCIÓN DE 45MIN DE CLASE X 15MIN DE DISCUSIÓNS
-SOLICITADOS 2 CRÉDITOS DE LIBRE ELECCIÓN PARA O ALUMNADO DA UVIGO
-DATAS: DO 25 AO 28 DE XUÑO DE 2009
-LUGAR: CENTRO SOCIAL DE FORCAREI E OBSERVATORIO ASTRONÓMICO DE FORCAREI (OAF)
-ORGANIZA: FC3
-COLABORAN: GRUPO AS1 DE ASTRONOMÍA E ASTROFÍSICA DA UVIGO; CONCELLO DE FORCAREI
-PROFESORADO: LUIS F. MIRANDA (IAA-CSIC); FRANCISCO VIOLAT (ASESORES ASTRONÓMICOS CACEREÑOS); DAVID RAPOSEIRAS (FC3 - CONCELLO DE FORCAREI); JESÚS PÉREZ BASTOS (FC3); JORGE CABALEIRO (FC3); ANA ULLA (FC3, GRUPO AS1 E GRUPO ESPECIALIZADO DE ASTROFÍSICA DA REAL SOCIEDAD ESPAÑOLA DE FÍSICA).
-COORDINA: ANA ULLA
-LÍMITE DE PRAZAS: 25 PERSOAS
-PLAZO LÍMITE DE INSCRICIÓN: ATA O 18 DE XUÑO
-NECESIDADE DE COÑECEMENTOS PREVIOS: NON
-PREZO: 150,00 EUROS PARA PÚBLICO EN XERAL
GRATUITO (ACREDITANDO TAL CONDICIÓN) PARA i) MEMBROS DA COMUNIDADE UNIVERSITARIA DE VIGO E ii) HABITANTES DE FORCAREI
-INFORMACIÓN E MATRÍCULA: concello.forcarei@eidolocal.es; fax: 986754082; tlf.: 986755036

Observacións do Clube Vega en Ames

2009-05-22T17:23:00.004+02:00

O Clube Compostelán de Astronomía Vega organiza, convocadas polo Concello de Ames, dúas observacións para os veciños e veciñas que se apuntaron ás mesmas, e que terán lugar de 22 a 24 horas nos seguintes lugares e días:

Venres 29 de maio en Bertamiráns (Lugar de encontro: ás 22h. no aparcadoiro do centro comercial Carrefour).

Sábado 30 de maio no Milladoiro (Lugar de encontro: ás 22h. no aparcadoiro da Casa da Cultura do Milladoiro).

Tes máis información sobre o Clube Vega aquí

Astronomia Nova

2009-05-22T17:10:00.005+02:00

Dentro do seu activo programa de divulgación da Astronomía, o Observatorio Astronómico Ramón María Aller da USC organiza unhas xornadas didácticas os próximos días 29 e 30 de maio.
Baixo a denominación "Astronomía Nova", título dunha importante obra de Kepler publicada hai 400 anos, agrúpanse un conxunto de interesantes charlas e obradoiros cuxo programa poder ver pinchando aqui.
A inscrición é libre até cubrir o total de prazas ofertadas. Para apuntarte, envía un email aos enderezos que se indican nesa páxina. Anímate a participar!

AnB na Feira de Primavera do barrio de San Pedro

2009-05-11T14:51:00.009+02:00

Logo dun mencer anubrado, finalmente o tempo acompañou e o barrio de San Pedro, unha vez máis, foi unha festa. Puxemos un posto na rúa de AnB a iso das 18.00h e por alí estivemos até medianoite. Saturno e a Lúa non fallaron á cita!

E o próximo sábado, 9 de Maio, no barrio de San Pedro

2009-05-04T17:52:00.009+02:00

O proximo sábado, día 9 de maio, a Asociación de Comerciantes do Barrio de San Pedro de Compostela organiza a súa xa tradicional Feira de Primavera, unha feira de artesanía na rúa de San Pedro, feita peonil por un día, con diferentes actividades lúdicas e culturais.

A feira durará todo o día (desde primeira hora da mañá até as 21.00) e por alí andaremos cos telescopios de Astronomía na beirarrúa. Se a noite acompaña botaremos un ollo á Lúa (chea), a Saturno (cos aneis case de canto) e ás estrelas que alumean un dos máis activos barrios da cidade (e alumean tamén aos demais, claro :-)

Estades tod@s convidad@s !

Apagamos o Obradoiro... encendemos o ceo

2009-05-04T17:29:00.006+02:00

Fixémolo :-) Pegámonos o gustazo.
O sábado pasado desfrutamos dos ceos composteláns desde a Praza do Obradoiro coa maior parte dos deslumbrantes focos apagados, mantendo só unhas cantas farolas que erán máis que suficientes para ver con comodidade a praza, as persoas e o ceo. A noite foi unha festa. Dezaoito dos mellores telescopios de Galicia, manexados polos bós afeccionados e afeccionadas de asociacións moi activas neste campo fixeron pasalo ben a todos os que por alí se achegaron. A praza estaba chea de veciños e visitantes. Como a xente que anda nisto da Astronomía dalle aos idiomas, as explicacións foron en galego, castelán, inglés, frances, portugués, alemán, italiano... Non pararon até ben pasada a medianoite.
Parabéns e mil grazas a todos os astronómos/as que participaron, unha lista demasiado longa de nomes para recollelos aquí, provintes das asociacións
Clube Vega de Compostela,
Asociación Astronómica de Vigo,
Ourense Astronómico,
A.A. Rias Baixas,
Cielobarbanza,
Sirio de Pontevedra...
Visitade as súas webs. Pagan a pena.

Informarémosvos en canto suban a web as fotos da xornada...

Xuntanza de Telescopios o sábado 2 de Maio na Praza do Obradoiro

2009-04-29T16:30:00.005+02:00

No marco das celebracións do Ano Internacional da Astronomía 2009, a Vicerreitoria de Cultura da Universidade de Santiago de Compostela e o Clube Vega de Astronomía, coa colaboración de Turismo de Santiago-Incolsa e da Concellaría de Promoción Económica, Emprego, Comercio e Turismo, organizan unha Xuntanza de Telescopios que terá lugar o próximo sábado día 2 de Maio, na Praza do Obradoiro, con comezo ás 20h e remate ás 24h.

Nesta mostra participarán afeccionados e asociacións de toda Galicia, que porán a disposición do público asistente os seus telescopios e ofrecerán o seu asesoramento a todas as persoas que o desexen. A xornada inscríbese nas accións que se están a desenvolver a nivel mundial promovidas por diversos organismos internacionais para a recuperación do ceo nocturno como parte da paisaxe cotiá das nosas cidades e vilas, e como elemento fundamental do patrimonio cultural da humanidade, na liña recollida na Declaración Starlight (La Palma, 2007) recentemente adoptada pola Universidade de Santiago de Compostela. Será tamén unha ocasión para dar a coñecer as causas e efectos da contaminación lumínica e as súas posibeis solucións.

Será unha actividade lúdica e festiva, aberta a toda a cidadanía e ás persoas que nos visiten ese día, e incluirá unha observación nocturna dos ceos composteláns á que convidamos a todos os asistentes.

Curso "Ceos de Compostela"

2009-04-20T18:25:00.004+02:00

Dentro das actividades do Ano Internacional da Astronomía 2009, a USC en colaboración con Turismo de Santiago-Incolsa, e a Concellaría de Promoción Económica e Turismo do Concello de Compostela organiza o curso "Ceos de Compostela" dirixido a membros da comunidade universitaria, profesionais do turismo, animadores socioculturais e persoas interesadas, co obxectivo de proporcionar a formación básica para organizar e desenvolver actividades co ceo como centro de interese.

No curso abordaranse, entre outros contidos: O ceo da ciencia / Os ceos do Camiño de Santiago / O ceo e nós / Actividades da USC no AIA2009 / Organizacion de actividades / Sesións prácticas de observación

Profesorado:
Teresa Amado (Área de Filoloxía Grega, USC); Salvador Bará (Área de Óptica, USC, coordinador); Pedro Pablo Campo (Área de Astronomía, USC); Cecilia Criado (Área de Filoloxía Latina, USC); José Ángel Docobo (Área de Astronomía, USC); Begoña Fernández (Área de Historia da Arte, USC); José Ramón Mariño (Área de Antropoloxía Social, USC); Juan Monterroso (Área de Historia da Arte, USC); Fernando Mujico (Turismo de Santiago - Incolsa); Amelia Pereiro (Área de Filoloxía Grega, USC)

O prazo de inscrición remata este mércores día 22 de abril.

Máis información.

Muller e Astronomía

2009-04-20T18:17:00.002+02:00

A coordinación estatal do Ano Internacional da Astronomía 2009 ten, entre os seus proxectos principais, o programa Ela é unha astrónoma, en cuxo equipo de traballo está a nosa compañeira do Observatorio Astronómico da USC Josefina Ling, e do que podedes ter máis información aqui.

A televisión educativa da UNED gravou no Observatorio Astronómico "Ramón María Aller" da USC un programa sobre a decisiva contribución das mulleres ao desenvolvemento da Astronomía que se emitiu o venres día 17 de abril de 10 a 11h. Podes velo nas webs

- Canal UNED http://www.canaluned.com
- www.rtve.es
- Canal Internacional de TVE www.rtve.es/television/tve-internacional

Programas de Cooperación na USC

2009-04-01T20:36:00.009+02:00

Nos programas de cooperación "Descubre o ceo" e "Astronomia na beirarrúa" organizamos saídas nocturnas para desfrutar do ceo cos estudantes dos distintos centros da USC e coas asociacións veciñais dos barrios da cidade. As actividades fanse en datas variadas ao longo do ano, segundo a disponibilidade das persoas en cada centro/barrio (e segundo as condicións meteorolóxicas, claro) polo que non hai un calendario preestablecido.

Os estudiantes da USC poden conseguir un crédito de libre configuración colaborando na organización e realización destas actividades durante 20 horas, repartidas de xeito flexíbel entre agora e o remate do curso (setembro). Para apuntarse chega con mandar un correo á Vicerreitoría de Cultura da USC (vrcultur@usc.es) pedindo participar no programa "Descubre o ceo / Astronomia na beirarrúa". O límite de prazas é de 60, por orde de inscrición. Para participar nesta actividade non hai que pagar ningunha cota, é de balde.

Faremos un cursiño de formación práctico para que as persoas que queiran colaborar con nós coñezan as cousas que hai no ceo, como velas, como manexar facilmente un telescopio e tamén como organizar observacións participativas no campus ou nos barrios. As datas para ese curso non están aínda fixadas porque para iso teremos unha reunión informativa a mediados de abril na Escola Universitaria de Óptica (edificio Monte da Condesa, Campus Sur), na que en función do número e posibilidades da xente interesada tentaremos poñer as datas máis axeitadas para todos. Se queres que te avisemos cando se convoque esta reunión envíanos un mail.

Actividades no IES 1 de Ordes

2009-03-10T17:50:00.003+01:00

Así de interesante estaba o terminador da Lúa, visto por telescopio, na noite de onte. Unha noite na que desfrutamos co profesorado e estudantes do IES-1 de Ordes vendo todo o que había no ceo. As nubes altas da tarde deron paso a unha preciosa noite despexada na que Venus, Saturno, A Lúa, Orión e as Pléiades eran un regalo para os ollos.

Antes da observación, Josefina Ling, do Observatorio Astronómico RamónMaría Aller da USC, rescatou do esquecemento a mulleres que colaboraron decisivamente no desenvolvemento da Astronomía (ver nova na prensa).

Parabéns ao Departamento de Matemáticas do IES-1, organizador das actividades desta Semana da Ciencia!

O Ano Internacional da Astronomía na USC

2009-02-02T17:51:00.008+01:00

A Vicerreitoría de Cultura da Universidade de Santiago de Compostela decidiu celebrar por todo o alto o AIA-2009, cun interesante conxunto de programas de actividades que vos convidamos a coñecer facendo clic na ligazón:

http://www.usc.es/aia2009/

Animádevos a participar. Estades, como sempre, convidad@s!

Bo Ano da Astronomía 2009 !!

2009-01-08T19:21:00.004+01:00

O ano no que entramos foi declarado pola UNESCO Ano Internacional da Astronomía, lembrando que hai 400 anos Galileo, ao apuntar ao ceo cun telescopio que el mesmo fabricara, descubriu todo un mundo que fixo cambiar as nosas ideas sobre a natureza logo de librar unha dura batalla pola libertade de pensamento.

Moito cambiaron os tempos dende entón, por máis que as ameazas á libertade de investigación non desapareceron completamente da paisaxe (que pasaría se Galileo levantase a cabeza?)

Na Universidade de Santiago de Compostela estase a preparar un amplo programa de actividades do que vos manteremos informados. En moitas delas participaremos dende Astronomía na beirarrúa e o Clube Vega. Estades tod@s convidad@s!

Deixámosvos cun precioso video da web de NASA (clic aqui). Desfrutádeo!

O sábado 13 de decembro, na Rúa de San Pedro

2008-12-09T20:38:00.003+01:00

O sábado que ven hai de novo festa na Rúa de San Pedro...
Unha nova edición do Mercado de Nadal, con postos na rúa de artesáns e comerciantes do barrio e do mundo, e con actividades ao longo de todo día.
O programa é variado, como podedes ver na imaxe (facede clic nela para vela ampliada).
Se o tempo acompaña, alí estaremos cos telescopios de Astronomía na beirarrúa a partir das 18.30h para desfrutar do ceo cos veciños e veciñas do barrio e con todas as persoas que se acheguen onda nós.
Estades todos convidados!

Actividades recentes

2008-11-28T19:01:00.008+01:00

O mes de Novembro estivo cheo de actividades. Aquí tedes algunhas fotos. De arriba abaixo: a Biblioteca Municipal de Ames no Milladoiro, onde o sábado 22 tivemos unha animada sesión de imaxes do ceo e montaxe de telescopios con rapaces da zona; a sesión de observación no Campus Sur da USC durante o Magosto organizado polas Asociacións Veciñais da cidade; e unha imaxe da mesa redonda "Gallaecia Astronómica" no VIII Obradoiro de Astronomía e Astrofísica celebrado en Forcarei o 13 e 14 de Novembro, na que interviron (de esquerda a dereita), J.R. Vidal do Observatorio Astronómico Monte Deva de Xixón, M. Díaz da Universidade de Vigo, Roberto López, do Instituto de Astrofísica de Canarias, Minia Manteiga da Universidade da Coruña e Víctor Costa, do Instituto de Astrofísica de Andalucía.

Magosto Veciñal en Compostela

2008-11-12T16:17:00.005+01:00

Este sábado día 15 hai un Magosto que organizan as asociacións que están no Consello Municipal de Relacións Veciñais. Será a partir das 18.30 h, no Campus Sur da USC, no paseo central que hai ao baixar da Alameda.
As asociacións veciñais que o promoven (as mesmas que en Maio pasado pediron ao concello que loitase contra a contaminación lumínica para poder ver a Vía Láctea dende o Obradoiro: máis aquí) convidaron a Astronomía na beirarrúa a participar montando unha observación do ceo. Todas e todos sodes benvidos. Andaremos por alí cos trebellos a partir das 19.30 ou así... se andas por Kompos, agardámoste!

VIII Obradoiro de Astronomía e Astrofísica: GALLAECIA ASTRONOMICA

2008-11-12T14:34:00.002+01:00

Organizado pola Área de Astronomía e Astrofísica da Universidade de Vigo, os próximos días 13 e 14 de Novembro de 2008 terá lugar no Centro Social de Forcarei o "VIII Obradoiro de Astronomía e Astrofísica: GALLAECIA ASTRONOMICA", no marco da Semana da Ciencia de Galicia 2008.
Esta actividade conta con financiamento da Xunta de Galicia, Universidade de Vigo e do Concello de Forcarei, e a na súa realización colaboran a Fundación Ceo, Ciencia e Cultura, Asociación Astronómica de Vigo e Astronomía na beirarrúa (Universidade de Santiago de Compostela - Clube Vega).
Entrada é libre e gratuita. Se queres baixar o interesante programa de actividades (pdf) fai clic aquí.

Máis estrelas que no cine!

2008-11-04T13:14:00.004+01:00

O Clube Vega de Astronomía, coa colaboraciónde AnB, organiza dúas actividades para nenos e nenas nas bibliotecas do Millaroiro e Bertamiráns (Concello de Ames), os sábados 22 e 29 de novembro. Aqu í tedes a información tal como a recolle o xornal "La Voz".

Nova version de Stellarium !

2008-10-16T18:55:00.005+02:00

Boas novas! Stellarium, ese programa tan útil e fermoso para ver que hai no ceo en calquera momento, sacou recentemente a súa versión 10.0 (beta) cunha interfaz moi mellorada, e con versión en galego. Se queredes descargalo, ide a http://www.stellarium.org/ e escollede o sistema operativo no que o queredes usar (Linux, Windows ou Mac OS X).

Facede clic na imaxe se queredes vela ampliada.

Mil grazas, dende aquí, a todas as persoas que adican parte do seu tempo a elaborar software libre para Astronomía. Neste caso, en particular, á equipa de Stellarium: Fabien Chéreau, Rob Spearman, Johan Meuris, Johannes Gajdosik, Matthew Gates, Nigel Kerr e András Mohari, e un agradecemento moi especial aos seus tradutores ao galego, Jorge A. Pérez Prieto (do Clube Vega, que comezou na version 0.8) e Manuel Rosales. Thanks! ;)

Curso de Verán en Rianxo

2008-07-22T17:30:00.019+02:00

Os pasados días 8 ao 12 de xullo estivemos en Rianxo, no Curso de Verán sobre Astronomía e Contaminación Lumínica organizado por Astronomía na beirarrúa (AnB) e o Observatorio Astronómico Ramón María Aller (OARMA) da USC. No programa: Mesas redondas e obradoiros polas tardes, e observacións na rúa polas noites na Praza de Castelao, na ribeira de Rianxo e no lugar de Asados, en colaboración coa Asociación Cultural Barbantia e o Centro Cultural Simón Varela.

Na primeira imaxe (de La Voz), a sesión de apertura na tarde do día 8, con -de esquerda a dereita- Pedro Piñeiro (alcalde de Rianxo), Ánxela Bugallo (Conselleira de Cultura do Goberno Galego) e Elías Torres (Vicerreitor de Cultura da USC). Nas outras dúas imaxes, un momento da charla de Xoán Doldán (profesor do Dpto de Economía Aplicada da USC) sobre aspectos enerxéticos da Contaminación Lumínica e a mesa redonda sobre Asociacionismo, Contaminación Lumínica e Participación Social con Carlos Herranz (Presidente de Cel Fosc, Asociación contra a Contaminación Lumínica), Ricardo Moreno (Presidente da Asociación Astronómica de Vigo), Javier Vázquez (Secretario do Clube de Astronomía Vega de Santiago de Compostela) e José Antonio Álvarez (Secretario da Asociación Astronómica de Ourense).

Na sesión de peche, o sábado 12, Cipriano Marín (IAC-UNESCO) fixo unha moi interesante presentación da Iniciativa Starlight, da que é Coordinador, así como da "Declaración en defensa do ceo nocturno e do dereito a observar as estrelas" cuxo breve e impecábel texto podes consultar aqui

O sábado 5, na Praza Roza

2008-07-02T20:18:00.006+02:00

A Asociación Veciñal "Raigame", o Centro Sociocultural do Ensanche e a agrupación Santiago Centro organizan para este próximo sábado día 5 a I Festa Cidadá do Ensanche, na que tamén colaboraremos dende Astronomia na beirarrúa cunha observación a partir da posta do sol... O día estará cheo de interesantes actividades: desfrútaas! Podes ver o programa en detalle facendo clic sobre as imaxes para velas ampliadas

E vimos amencer...

2008-07-02T19:10:00.003+02:00

O pasado sábado nas festas de San Pedro vimos amencer.
Foron milleiros as persoas que estiveron pola rúa durante todo o día e non sabemos decirvos cantas se achegaron aos telescopios para ver Saturno, Xúpiter e a Lúa dende que se fixo noite até que saiu o sol do domingo, pero o certo é que non paramos. Coa música de fondo da orquestra e as terrazas na rúa cheas de xente até ben entrada a madrugada pasámolo fenomenal. Parabéns á comisión de festas e ás entidades do barrio!

Este sábado en San Pedro

2008-06-25T15:13:00.004+02:00

Este sábado, día 28, andaremos pola rúa de San Pedro durante todo o día, desfrutando das festas do barrio. Pasade por alí ! E pola noite observación na rúa, perto do Cruceiro, onde estará animando o baile a Orquestra Delirio. Queres coñecer o variado programa destas festas? Fai clic aqui. Parabéns á Comisión organizadora!

Noite no Casti

2008-06-23T15:05:00.004+02:00

O sábado pasado subimos os trebellos até o barrio do Castiñeiriño para ver o ceo dentro das actividades da Semana Cultural organizada pola Asociación Veciñal e o centro sociocultural. Non estivemos moita xente, e as nubes dunha fronte que entrou dende o Atlántico obrigáronnos a recoller todo a iso das 00.30, pero antes desfrutamos dunhas marabillosas vistas de Saturno e Xúpiter.

Contamos coa inestimábel axuda dos colegas da activa Asociación Cielobarbanza, que trouxeron uns bos equipos cos que os aneis de Saturno ou as bandas da atmósfera de Xúpiter parecían estar ao alcance da man.

Na foto, de esquerda a dereita, Vivencio, da directiva da Asociación Veciñal, Javi do Clube Vega ollando o ceo con binoculares, Johnny, presidente de Cielobarbanza e Marcos, membro desa asociación.

Imos de festa(s) !!!

2008-06-17T20:01:00.006+02:00

Estas semanas andaremos de novo pola rúa, de festa en festa, cos trebellos de ver o ceo. Para aquelas e aqueles que teñades tempo e vos preste, as próximas convocatorias son

- Sábado 21 de xuño: Estaremos no Campo da Festa no Barrio do Castiñeiriño para participar nas actividades organizadas pola Asociación Veciñal do barrio e o Centro Sociocultural. O Clube Vega organiza tamén unha observación no Centro Sociocultural da Trisca (San Pedro).

- Sábado 28 de xuño: Observación na rúa nas festas do Barrio de San Pedro. As actividades organízaas a Comisión de festas (http://fbsp.info/) co apoio da Asoc. Veciñal "A Xuntanza" ( http://www.axuntanza.org/) e a asoc. de comerciantes do barrio. Ese sábado hai feira de artesania na rúa durante todo o día. O programa de actividades preparado pola Comisión -dende o martes 24 até o domingo 29- é como todos os anos variado e interesante: botádelle unha ollada en http://fbsp.info/index.php?option=com_content&task=view&id=5&Itemid=6 e animádevos a pasar por San Pedro!

- Sábado 5 de xullo: Festa tamén por todo o alto na Praza Roxa, convidados pola Asociación Veciñal "Raigame", o Centro Sociocultural do barrio e Santiago Centro Comercio dentro da Primeira Festa Cidadá do Ensanche.

A partir das 21.30 ou 22h xa nos veredes... sodes benvid@s!

"Astronomía na beirarrúa" organiza actividades de astronomía nos espazos de vida cotiá dos barrios de Santiago de Compostela, en estreita colaboración coas asociacións e entidades veciñais. É unha iniciativa apoiada pola Vicerreitoría de Cultura da USC a traverso do seu Programa de Axudas a Proxectos de Cooperación Cultural e desenvolvida conxuntamente co Clube de Astronomía Vega de Santiago de Compostela.

Cielobarbanza: Astronomía na rúa en Boiro

2008-06-09T14:31:00.012+02:00

O pasado sábado, día 7 de xuño, estivemos en Boiro convidados pola Asociación Astronómica Cielobarbanza para participar con eles na súa primeira actividade na rúa nesa vila, que foi todo un éxito.

Moitas veciñas e veciños achegáronse até a Praza do Concello para disfrutar co ceo. A Lúa e Saturno foron, desta vez, os obxectos máis vistos.

Pasámolo fenomenal. Os nosos parabéns @s amig@s de Cielobarbanza. E tamén ao Concello de Boiro, polas facilidades que deu para desenvolver a actividade, entre elas a de apagar o alumeado público da praza.

Se queres entrar en contacto e colaborar con esa asociación, ou simplemente queres estar ao día das súas interesantes actividades bótalle un ollo ao seu blog (fai clic aqui)

A nova na edición do Barbanza de "La Voz" (clic aqui)

Programa do Curso de Verán

2008-05-19T16:53:00.007+02:00

Xa podes baixar en pdf o programa do Curso de Verán sobre Actividades de Astronomía nos concellos e contaminación lumínica que organizamos xunto co Observatorio Astronómico Ramón María Aller da USC: Fai clic aqui

A información xeral dos Cursos de verán da USC está na páxina http://www.usc.es/cultura/cveran08.htm

Información específica sobre o noso curso podes atopala en http://www.usc.es/astronab/CursoVeran08.htm

.

Santiago D.C. : O Consello de Relacións Veciñais propón apagar as luces do Obradoiro para observar a Vía Láctea

2008-05-13T18:24:00.004+02:00

Lido en "La Voz de Galicia" de hoxe

"Os representantes veciñais do ámbito urbano do Consello de Relacións Veciñais presentaron unha iniciativa no Concello de Santiago para promover o coñecemento da Vía Láctea entre os composteláns.

A proposta veciñal consiste en realizar un apagamento na praza do Obradoiro nos meses de xullo e agosto, co fin de evitar que a contaminación lumínica impida ver a galaxia. Sería entre as once e as doce da noite dos venres e os sábados. Para facilitar a observación, as asociacións veciñais e os clubs de astronomía porían a disposición dos interesados na observación monitores e telescopios.

Agustín Pena, promotor da idea e un dos representantes veciñais, indicou que a iniciativa xurdiu como consecuencia do éxito obtido polas actividades organizadas nos barrios de Sar e do Ensanche en colaboración co colectivo Astronomía na beirarrúa, no que están integrados profesores e estudantes da Universidade de Santiago (...)"

Se queres ler a nova completa fai clic aqui

Na imaxe de arquivo, os representantes das asociacións membros do Consello de Relacións Veciñais nunha xuntanza con membros da Corporación Municipal.

Fonte: web do Concello de Santiago

Curso de Verán

2008-05-09T16:01:00.007+02:00

Durante os días 8 ao 12 de xullo celebraremos na vila de Rianxo un Curso de Verán da USC sobre Actividades de Astronomía e Contaminación Lumínica.

O curso ten por obxecto facilitar a posta ao día das e dos asistentes sobre o problema da contaminación lumínica, contemplando as súas causas e consecuencias enerxéticas, científicas, culturais e medioambientais, así como as solucións viábeis e as estratexias para a concienciación social e institucional sobre o problema. O curso facilitará, tamén, o encontro dos axentes sociais interesados na recuperación da observación do ceo dende a vida cotiá como ferramenta educativa e de dinamización coa perspectiva de non renunciar a facer Astronomía dende espazos luminicamente contaminados.

O prazo para solicitar matrícula gratuita no curso remata o vindeiro día 15 de maio. Toda a información sobre os cursos de verán da USC está na páxina
http://www.usc.es/cultura/cveran08.htm

En breve se colgará aí o programa detallado do Curso. Se queres calquera información, non o dubides e escríbenos ao noso enderezo

Que hai no ceo estes días?

2008-04-16T11:36:00.003+02:00

Se queredes saber que se pode ver estes días nos ceos de Abril, baixádevos en pdf o útil Calendario Celeste preparado e editado polo Clube de Astronomía Vega de Santiago de Compostela. Facede clic na imaxe para ir a el.

Feira da primavera en San Pedro

2008-04-01T14:30:00.004+02:00

A Asociación de Comerciantes de San Pedro, coa colaboración da Comisión de Festas, a Asoc. Veciñal a Xuntanza, o centro sociocultural da Trisca, o Concello de Compostela e nós mesmos, organiza outro día de festa na rúa este sábado día 5 de abril. Alí estaremos, a partir das 20h, cos telescopios e prismáticos para disfrutar coas e cos amantes da astronomía que queiran botar un ollo ao ceo. E se prefires a (g)astronomía, apúntate tamén: terá lugar o primeiro concurso de tapas dos bares do barrio :-)

Estades tod@s convidad@s!
(Fai clic no cartaz se queres velo con maior tamaño)

De astrofesta nos Salgueiriños

2008-03-14T17:06:00.006+01:00

Onte xoves día 13 estivemos no compostelán barrio de Salgueiriños con José e outros veciños e veciñas da zona para disfrutar dunha noite de estrelas. As nubes marcharon, as farolas apagáronse e ... o ceo apareceu ante os nosos ollos.

Os máis solicitados: a Lúa, as Pléiades e, como non, Saturno, o Señor dos Aneis. Ou "a boliña cun aro" como ben o describiu un pequeno astrónomo que fedellaba cos telescopios sen precisar demasiada axuda. Tamén vimos o seu satélite Titán, como un pequeno punto de luz. Ah... e a nebulosa de Orión.

Podedes ver outras imaxes de Saturno premendo aquí

Próximas actividades

2008-03-07T16:47:00.004+01:00

Na semana do 10 ao 15 de Marzo voltamos á rúa! O luns 10 (ou o mércores 12, se o tempo o aconsella) estaremos no instituto de Ordes para facer unha observación cos profes, estudiantes e veciños da vila que queiran participar. E o xoves 13 plantaremos os trebellos no compostelán barrio de Salgueiriños, convidados por un grupo de amig@s e veciñ@s do barrio amantes da astronomía.
Convidámosvos a vir por calquera das dúas actividades. Sodes benvid@s!

Fotos do eclipse de Lúa da noite do 20 ao 21 de febreiro

2008-02-21T15:23:00.003+01:00

Onte houbo un precioso eclipse de Lúa, e as nubes que durante todo o día cubriron os ceos de Kompostela decidiron portarse ben: á noite despexaron e deixaron ver o eclipse sen dificultade. Estabades a durmir e perdéchedes o espectáculo? No problem! :-) : O coñecido fotógrafo compostelán Paco Rocha sacou dende o barrio de San Pedro unha preciosa serie de fotografías que podedes ver premendo aquí.

Fotos da noite branca en San Pedro

2007-12-18T13:41:00.000+01:00

Aquí tedes algunhas imaxes da noite do pasado sábado 15 no barrio de San Pedro (fai clic nelas para velas ampliadas). Se queredes ver máis, podedes visitar a web do fotógrafo Paco Rocha, que estivo con nós e aproveitou para retratarnos ás persoas... e á Lúa. Podedes velas facendo clic aqui

"Noite branca", na Rúa de San Pedro

2007-12-12T16:58:00.001+01:00

O próximo sábado día 15 de decembro, a Asociación de Comerciantes de San Pedro e a Comisión de Festas do Barrio organizan unha "noite branca" con tendas abertas e actividades até medianoite. Entre outras cousas, tiveron a boa idea de incluir un variado programa de actividades astronómicas, nas que colaboramos Astronomía na beirarrúa e o Clube Vega. Fai clic nas imaxes para velas aumentadas e coñecer o programa detallado de actividades. Os nosos parabéns a todas as persoas que fan posíbel esta inciativa, e en particular a Leonor, unha das promotoras da Asociación de Comerciantes e creadora da tenda de artesanía "Como pez en el agua", cuxa web podes visitar premendo aqui. Agardámosvos!

Máis dun planeta por semana...

2007-12-10T18:24:00.000+01:00

Para aquelas e aqueles de nós que aprendemos de memoria na escola a lista dos nove planetas, e que recibimos hai pouco a nova de que Plutón perdera ese noble título, pode resultar unha sorpresa saber que a día de hoxe se coñeza a existencia de máis de 260 planetas en torno a outras estrelas diferentes do Sol. As ciencias adiantan que dá gusto ;-) e este ano marcou un fito na historia da investigación, co descubrimento dun novo planeta por semana. De seguirmos así, estaremos pronto en condicións de detectar planetas semellantes á Terra. Se queres saber máis sobre os planetas extrasolares, visita a completa Enciclopedia dos Planetas Extrasolares ou o excelente site de Greg Laughlin oklo.org

De magosto no barrio de San Pedro

2007-11-22T15:21:00.001+01:00

O pasado sábado 17 de novembro estivemos cos trastos no barrio de San Pedro, no marco do magosto organizado pola Asociación Veciñal A Xuntanza co apoio da Comisión de Festas do Barrio. Unha noite de festa, castañas, Lúa e Pléiades. Como é habitual nese activo barrio, moitas veciñas e veciños participaron con nós. Aquí tedes unha foto dos teles plantados na Rúa Aller Ulloa, á beira da Porta do Camiño. Ramón María Aller Ulloa foi un astrónomo galego, fundador do Observatorio Astronómico da USC que hoxe leva o seu nome.

Outra noite de estrelas na Praza Roxa

2007-11-16T20:20:00.001+01:00

Convidados pola activa Asociación de Veciños "Raigame" do barrio do Ensanche compostelán, compartimos outra noite de estrelas coas veciñas e veciños da zona nova da cidade. As Pléiades, a magnífica estrela dobre Albireo e un cometa Holmes algo máis feble que en días anteriores formaron parte do menú. O Centro Sociocultural do barrio prestounos a pantalla para proxectar as presentacións e o Concello de Santiago tivo -unha vez máis- o detalle de apagar as luces da praza durante case tres horas para facilitar a visión do ceo.

NGC891: Unha galaxia preciosa

2007-11-16T20:08:00.000+01:00

Velaí unha imaxe de NGC891, unha preciosa galaxia vista de canto, obtida por Ramón Iglesias Marzoa do Clube Vega dende os contaminados ceos composteláns. As galaxias son agrupacións de miles de millóns de estrelas. O noso sistema solar forma parte tamén dunha galaxia, a Vía Láctea. Se tes a oportunidade de ir a algún lugar con ceos escuros, verás a Vía Láctea como unha banda que atravesa o ceo. Se queres ver unha imaxe de como pensan as e os astrónomos que se vería a Vía Láctea "dende fóra", fai clic aqui

A por Holmes!

2007-11-16T20:01:00.000+01:00

O pasado 9 de novembro andivemos á caza do cometa Holmes dende as instalacións da Escola Universitaria de Óptica e Optometría da USC. A contaminación lumínica e unha tenue capa de nubes altas non nolo puxeron doado, pero Holmes... estaba alí. Na imaxe, unha foto dos e das valerosas astrónomas que aguantaron o frío até última hora :-)

O cometa Holmes, dende Kompostela

2007-11-07T15:14:00.001+01:00

Velaí a fermosas imaxes do Cometa Holmes obtidas por Ramón I. Marzoa (Clube Vega / AnB) dende Compostela nas noites do 27 e do 31 de outubro. Podedes ver a brillante zona do núcleo rodeada pola nube de gas e pó expulsados logo da explosión do día 23 de outubro. O nome técnico desta nube é "coma" (que en latín quere decir cabeleira). Hai 50 anos o astrónomo Fred L. Whipple definiu os cometas como "dirty snowballs". Os cometas veñen sendo pois "suxas bolas de neve peludas" :-) Na segunda foto, tomada catro días despois da primeira, a nube ten maior tamaño: o cálculo preliminar que fixemos é que a velociodade de expansión da capa máis externa está perto dos 2000 km/h.

Non deixes de ver o cometa!

2007-10-29T20:30:00.000+01:00

Se as nubes despexan, non deixes de ver o cometa Holmes! Un modesto cometa que até hai uns días non se podía ver se non era con grandes telescopios tivo un repentino estoupido e aumentou tanto o seu brillo que hoxe se pode ver a simple vista, na constelación de Perseo, mirando cara o Norte (un chisco ao Leste) a primeiras horas da noite. A ollo parece unha estrela máis, debaixo e á esquerda de "alfa Persei" . Con prismáticos, vese moi ben a nube -de momento redonda- de gas e po en torno a el. É unha boa ocasión para observar un destes vellos viaxantes do sistema solar, que agora mesmo se alonxa de nós. Está a case 250 millóns de km da Terra, entre as órbitas de Marte e Xúpiter. Podes ver a súa posición e como se vai mover no futuro na web da Nasa, pinchando aqui.
Non cho perdas!
Que por que explotou Holmes? Elemental, querido Watson... :-)

E contamos estrelas...

2007-10-16T19:59:00.001+02:00

... pola cidade de Compostela, co resultado de que no Campus Sur puidemos velas até a magnitude 4, na Praza do Obradoiro a cousa quedaba en magnitude 3 (debido entre outros motivos aos cañóns de luz que alumeaban a fachada da catedral) e no Parque de Belvís os ceos chegaban á magnitude 5. A Vía Láctea, o Camiño de Santiago, hoxe por hoxe non se pode ver dende o Obradoiro. Évos o que hai... pero o cambiaremos! ;-)

Imos contar estrelas!

2007-10-10T20:23:00.000+02:00

Se o ceo se mantén despexado como até o de agora, mañá xoves día 11 de outubro sairemos á noitiña por Kompostela para contar estrelas... É un xeito práctico de medir a contaminación luminosa da cidade: o número de estrelas que se poden ver en calquera rexión do ceo diminúe se a contaminación aumenta. Contando as estrelas que se ven nunha zona determinada, e coñecendo polos mapas estelares cantas hai segundo o seu brillo podemos establecer cal é a "magnitude límite" visíbel dende cada lugar de observación.

Esta actividade enmarcámola na campaña mundial que dende o 1 ao 15 de outubro está promovendo a UCAR (University Corporation for Atmospheric Research) dentro do programa Xanela ao Universo.

Podedes atopar guías da actividade en diversos idiomas premendo aqui.

Se queres participar con nós envíanos un correo !

Estivemos na illa de Ons...

2007-08-14T16:28:00.001+02:00

... organizando actividades de astronomía no campamento xuvenil que o goberno galego ten no lugar de Pereiró, en colaboración coa boa xente da cooperativa TagenAta (web aqui).

Disfrutamos un montón da compañía das persoas e dos limpos e escuros ceos nocturnos da illa. Xúpiter cos seus satélites, as estrelas do triángulo de verán (Vega, Deneb e Altair), o Setestrelos, a Polar... pero, sobre todo, unha Vía Láctea preciosa, que con prismáticos se desfacía en máis estrelas das que ninguén pode contar. A Estación Espacial Internacional non fallou ás citas previstas, e a Lúa, que estaba chea arredor do 31 de xullo, deixounos un devalo cheo de sombras e contrastes na primeira semana de Agosto. Dende AnB, apertas a todas as persoas do campamento!

(na foto, a Lúa sobre o mar de Ons)

Calendario celeste do Clube Vega

2007-08-14T16:16:00.000+02:00

O Clube Vega ten a disposición de tod@s o interesante calendario celeste correspondente ao mes de Agosto, que podedes baixar en pdf premendo aquí. Podedes consultar outros números do boletín en www.clubevega.org -> Clube -> Boletíns. Parabéns dende aquí polo bo traballo realizado.

De Festas en San Pedro

2007-07-02T16:48:00.000+02:00

Pois nen o vento nen o orballo desanimaron ás veciñas e veciños do barrio compostelán de San Pedro, que celebraron as festas dende o mércores 27 de xuño até o domingo 1 de xullo. O sábado, Feira de Artesanía e asociacións na rúa, onde, como non, estivemos. Os nosos parabéns á Comisión de Festas polo bo traballo realizado.

Aí vos van algunhas fotos da xornada!!

AnB no Hospital Clínico Universitario (CHUS) de Santiago de Compostela

2007-07-02T16:27:00.000+02:00

O pasado xoves día 28 de xuño estivemos no Clínico, para ver as estrelas cos rapaces e maiores alí ingresados, nunha actividade organizada pola incansábel Ruth Gómez Vázquez, da Escola que ten a súa sede nas instalacións deste centro sanitario.

Como case sempre, en canto nos poñemos a observar esquecemos sacar fotos :) así que aquí vos van un par delas dos preparativos, nas que andamos a montar os trebellos nunha das terrazas do segundo andar, fachada oeste. Na imaxe de arriba, e de esquerda a dereita, Ramón, do Clube Vega, axustando a "Celestino", un reflector en montura Dobson feito polos membros do clube; Javi, tamén de Vega, camiño do refractor de 90 mm; Nana, da Agrupación Ío, poñendo a andar o ETX70 e, detrás, Rubén, de Vega.

O ceo, que estivo cheo de nubes durante todo o día, deixounos un precioso solpor e grandes claros a partir das 22.45h, co que puidemos ver até fartarnos Venus, Saturno cos seus aneis, Xúpiter e os seus satélites e a Lúa, case chea esa noite. Voltaremos!

Convidámosvos ás Festas do Barrio de San Pedro

2007-06-26T18:09:00.001+02:00

O Barrio de San Pedro, en Santiago de Compostela, está de festa dende este mércores 27 de xuño até o domingo 1 de xullo. Astronomía na beirarrúa estará de novo coas veciñas e veciños do barrio na Feira de Artesanía ao longo do sábado 30, e pola noite, se o tempo acompaña, facendo unha observación na rúa aberta a todos.
As festas están organizadas por unha das Comisións máis activas, novas e creativas da cidade. Os nosos parabéns polo xenial traballo que levan desenvolvendo nos últimos anos. Non deixedes de visitar a páxina web da Comisión, facendo clic aquí.
Se queres ver o variado e interesante programa das festas, aquí o tes: Programa
Agardámoste! Non deixes de vir!

Noite Internacional da Astronomía na Beirarrúa

2007-05-21T17:17:00.001+02:00

Organizada por asociacións e clubes de astronomía de todos os continentes, o pasado sábado día 19 de maio celebrouse no planeta Terra a ISAN - International Sidewalk Astronomy Night.
Astronomia na beirarrúa uniuse ao evento, como non. Tiñamos prevista unha observación sorpresa na cidade. Claro que, debido á mesta cuberta de nubes que había sobre Compostela, tivemos de cambiar de plans e adicamos o tempo a charlar da terra, do ceo e... de todo.

A ver se para o ano o Meteosat nos dá unha tregua :)

A luz das estrelas, patrimonio de tod@s

2007-05-14T12:49:00.000+02:00

NOTA DE PRENSA DO INSTITUTO DE ASTROFÍSICA DE CANARIAS 23/ABRIL/2007

Presentouse a proposta para a

Declaración Mundial sobre o Dereito á Luz das Estrelas

"A sesión de clausura da Conferencia Internacional en Defensa da Calidade do Ceo Nocturno e o Dereito a Observar as Estrelas destacou a necesidade de dar continuidade a esta iniciativa

Logo de dous días de conferencias, charlas e demais actividades, o pasado venres dábase a coñecer o texto para a proposta de Declaración Mundial sobre o Dereito á Luz das Estrelas.

Tamén denominada “Declaración Starlight de La Palma”, afirma que o ceo foi, e seguirá a ser, unha fonte de inspiración para a humanidade; a súa contemplación representa, para todas as civilizacións, un elemento esencial no desenvolvemento do pensamento científico e humanístico.

Segundo se afirma na declaración, o dereito a un ceo nocturno nítido e á capacidade de observar o firmamento debe considerarse equiparábel ao resto dos dereitos (medioambientais, sociais e culturais). Ademais, a progresiva degradación do ceo nocturno é unha grave perda, polo que compre implicar a gobernos e institucións para que instauren normas que protexan os ceos nocturnos, facendo do consumo intelixente da enerxía un hábito. O coñecemento e a educación son poderosos vectores que poden achegar a ciencia á sociedade e contribuír ao avance da humanidade. Debe tamén promoverse o turismo cultural das estrelas como un recurso e un valor a potenciar, sen esquecer a salvagarda da biodiversidade asociada á noite.

Como afirmaron varios participantes, este é o comezo dun longo camiño, pero se espera que con este paso sexa posíbel establecer as bases dunha defensa efectiva contra a contaminación lumínica. No planeta todo acaba repercutindo en todos, polo que a defensa dos ben comúns debe facerse dende todos os países e de xeito multidisciplinar. O tesouro que representa o ceo nocturno debe garantirse formalmente para a súa protección, e ese foi e é o obxectivo principal de “Starlight”. "

"La Palma Declaration" (texto en inglés)

"Declaración de La Palma" (tradución ao español)

Máis información na páxina web da “Conferencia Internacional en Defensa da Calidade do Ceo Nocturno e o Dereito a observar as estrelas”
www.starlight2007.net

"Primeira luz" do Mak

2007-05-03T20:59:00.000+02:00

O pasado 21 de abril, dende o alto do Monte da Condesa, no Campus Sur da Universidade de Santiago de Compostela, viu a súa "primeira luz" un telescopio tipo Maksutov- Cassegrain de Astronomía na beirarrúa. Con 150 mm de diámetro, unha focal de 2 metros, e montura motorizada HEQ-5 é unha gozada de trebello. Esa noite había algo de turbulencia pero así e todo as vistas de Saturno, a Lúa e algúns cúmulos e galaxias (o que se adoitan chamar "obxectos de ceo profundo") eran despampanantes.
Na foto tedes aos cinco participantes no evento: de esquerda a dereita, Ramón (Clube Vega), Javi (Clube Vega), "o Maksutov" alineado e listo para observar (AnB), Rubén (Clube Vega e USC) e Salva (USC). A foto de abaixo é unha imaxe de Saturno obtida colocando unha cámara dixital barata a continuación do ocular do telescopio, con zoom óptico 3x, e sacando un pequeno video (avi) do cal se separaron as imaxes, se alinearon e sumaron para diminuir o ruido e atenuar en parte os efectos da turbulencia. O procesado foi feito co programa libre Registax (Para as persoas afeccionadas ao tratamento de imaxes por ordenador: só se realzou o obxecto cun filtrado suave con "wavelets", e a tonalidade da imaxe tal cal saíu da cámara non foi retocada: Visualmente Saturno tiña un tono menos azulado).
Pasar pasámolo en grande e esperamos que este instrumento nos dea moitas noites de observación.

Atopan un planeta parecido á Terra na zona habitábel da estrela Gliese 581

2007-05-01T18:42:00.000+02:00

E do Barrio de San Pedro a un lugar perto dunha estrela a 190 billóns de kilómetros da Terra (si, si, "billóns" con "b").

Un equipo de astrónomos portugueses, suízos e franceses do Observatorio Europeo Austral (ESO) acaba de facer público o descubrimento dun planeta non demasiado diferente da Terra orbitando arredor da estrela Gliese 581. O novo planeta (Gliese 581 c), cun diámetro 50% maior que o da Terra, e unha masa unhas cinco veces superior, está a unha distancia tal da súa estrela que as temperaturas nel poderían permitir a existencia de auga líquida. Aínda non se puido detectar a presencia da auga, como tampouco existen datos fiábeis sobre as temperaturas reais na súa superficie, que poderían ser moi superiores ás previstas se no planeta existise un forte "efecto invernadero". Porén, a noticia é relevante, porque dos 229 planetas atopados até hoxe fóra do sistema solar (sabías que había tantos...?) a maioría son moito máis grandes que a Terra e están situados demasiado perto ou demasiado lonxe do seu sol como para poder albergar vida, tal como a coñecemos.

Se queres sabelo case todo sobre os planetas extrasolares detectados até o de agora, bótalle un ollo á Enciclopedia dos planetas Extrasolares

Titulares na web do E.S.O.:

Astronomers Find First Earth-like Planet in Habitable Zone

The Dwarf Carried Other Worlds Too!

Feira na Rúa de San Pedro

2007-04-16T14:38:00.000+02:00

Estivemos de novo no barrio de San Pedro. Día precioso, rúa peatonalizada, feira de troco e venda de produtos de tendas e artesáns do barrio e de toda Galiza... e un posto de Astronomía na beirarrúa, claro!. Dende as 10.00 até as 20.00 de palique cos veciños e veciñas na metade da rúa, de onde son as imaxes que podedes ver aquí. A persoa que sae nas fotos atendendo o posto é o incansábel Ramon I. Marzoa, vicepresidente do Clube Vega que non tivo un minuto de respiro atendendo ás persoas que se achegaron a onde estabamos.
Pola noite, observación na Porta do Camiño. O aire moi tranquilo, nen pizca de vento, e unha atmósfera limpa e transparente deixáronnos disfrutar de Saturno coma nunca antes. O seu satélite Titán e mesmo a sombra que os aneis proxectaban sobre o planeta se podían ver con claridade. Podedes ver como recolleu a prensa local estas actividades nas seguintes ligazóns: La Voz, El Correo.
Aquí tedes algunhas fotos do día; en canto nos cheguen todas as que fixeron os compas e amig@s subiremos unha selección a unha páxina da que vos informaremos.
Parabéns á Comisión de Festas do Barrio por esta magnífica iniciativa e polo apoio que nos prestaron. Non vos perdades as festas deste ano, a finais do mes de xuño!

A noite na Praza Roxa foi un éxito. Novas actividades

2007-04-03T19:18:00.000+02:00

Hai días nos que acontecen pequenas casualidades que case chegan a milagres :) O pasado 23 de marzo pensamos que a chuvia e as nubes non nos permitirían facer a observación na rúa cos veciños do Ensanche e mesmo tiñamos prevista unha actividade alternativa nos locais do centro sociocultural... Pero, afortunadamente, o ceo quedou limpísimo de nubes ás 20h e permaneceu así até pasadas as 22h. Puidemos pois plantar telescopios xunto cos amigos do Clube Vega e celebrar coa Asociación Veciñal Raigame o seu XX aniversario, vendo "en directo" a Lúa, Venus, Saturno e a Nebulosa de Orión, berce onde están a nacer nestes mesmos momentos novas estrelas.

Que conste que dúas persoas, independentemente, xa nos avisaran de que habería boa noite e poderíamos observar... unha delas Agustín Pena, Secretario da A.V. Raigame, que debe ter algún contacto segredo co Meteosat :). A outra, José Ángel Docobo, director do Observatorio Astronómico "Ramón María Aller" da USC, que non puido estar esa noite con nós por ter outras obrigas previas. A proxección de imaxes astronómicas foi posible grazas aos medios prestados pola Asociación Veciñal A Xuntanza de San Pedro e polo Centro Sociocultural do Ensanche, ao frente do cal está, dende a súa recente apertura, Tate. O Concello de Santiago colaborou tamén apagando o alumeado público da Praza Roxa, a petición da asociación veciñal, o que fixo aparecer de súpeto o ceo ante os nosos ollos. A todos eles, e aos compas de MeteoGalicia, un saúdo dende aquí.

Esperamos que a experiencia de reducir o nivel de luz fose positiva para a administración e os veciños e que se dean pasos decididos para rematar co derroche inútil de recursos e coa contaminación lumínica que provoca, e recuperar así o ceo nocturno como parte da nosa vida cotiá.

E voltamos á rúa! O sábado 14 de abril, dende as 11h até as 20h participaremos cun posto na Rúa de San Pedro, na Feira de Artesanía que organiza a incansable Comisión de Festas do Barrio. Se hai boa noite o mesmo quedamos por alí para observar coas veciñas e veciños que se acheguen onda nós. Vinde visitarnos!

:) Temos "Plan B" para este venres! :)

2007-03-22T18:31:00.000+01:00

Choverá mañá á noitiña? Non choverá? Haberá nubes e claros, como din algúns pronósticos ou caerán chuzos de punta? Neste momento non apostaríamos o soldo enteiro por unha cousa ou outra. Os nosos compas de MeteoGalicia prevén nubes e claros, aínda que non din se máis nubes que claros ou ao contrario :)

Temos "plan B", non imos cancelar a actividade prevista para este venres .

A poucos metros da Praza Roxa, na rúa Frei Rosendo Salvado 14-16 está, aberto aos veciños e veciñas, o novo Centro Sociocultural e Xuvenil Municipal do Ensanche. Un Centro noviño do trinque, que paga a pena coñecer, e que ten unha zona de exposicións á entrada con amplos ventanais, ben visíbel para calquera que pase pola rúa. Se mañá pasades pola Praza Roxa a partir das 20h e non nos vedes, será porque o ceo estárá cuberto de todo: estaremos entón no Centro Sociocultural, até iso das 22h (o centro pecha a esa hora ou un chisco antes), cos telescopios montados expostos na entrada para que calquera poida velos e/ou aprender a manexalos. Convidámosvos a pasar por ali!

Agradecemos de verdade á dirección do Centro a súa sensibilidade e axuda acolléndonos en caso de mal tempo.

E se en calquera momento se abre o máis mínimo buratiño na capa de nubes, levaremos inmediatamente os trastos á Praza Roxa para observar, porque a Lúa, Venus, Saturno e as Pléiades están preciosos nesta época do ano.

Voltamos á rúa!!

2007-03-19T15:21:00.000+01:00

Voltamos á rúa!! Se o tempo non o impide, o próximo venres día 23 de marzo a partir das 20.30 horas estaremos con todos os trastos na Praza Roxa, convidados pola Asociación Veciñal "Raigame" para celebrar os seus 20 anos da mellor forma posíbel: recibindo á primavera.

Estades todas e todos convidados, e se alguén quere botarnos unha man coa organización ou manexo dos teles, é benvid@! No menú da noite temos Venus, Saturno, a Lúa, a nebulosa de Orión, as Pléiades... hai onde elixir.
Se o tempo está malo quedaremos cos telescopios nalgún local do barrio que anunciaremos oportunamente, para vernos e charlar, e tentarémolo de novo o venres seguinte día 30.
Desexámoslle a RAIGAME que cumpra moitas máis primaveras...

Fotos do Cometa Hale Boop

2007-03-19T15:04:00.000+01:00

A principios de xaneiro deste ano, o cometa McNaught apareceu por sorpresa no ceo brillando intensamente durante uns días... e iso fíxonos lembrar que hai dez anos, en abril de 1997, visitou os nosos ceos un dos cometas máis fermosos e impresionantes das últimas décadas: o cometa Hale-Boop.

Juan Ponte enviounos estas fotos que sacou daquela, utilizando película Fuji G-400, e sistema de guiado manual realizado con cámara reflex Pentax en paralelo co telescopio. (Fai clic aqui se queres velas... A páxina pode tardar algo en cargar porque cada foto é duns 700 K, máis ou menos: Pero pagan a pena!)

Temos novo espazo no servidor web...

2007-01-26T14:48:00.000+01:00

Boas novas! temos novo espazo no servidor web da USC, o que nos vai permitir subir máis imaxes e información... De momento xa podedes ver as fotos da noite que pasamos na Praza Roxa, cos amigos da Asociación Veciñal "Raigame" e moitos veciños e veciñas, facendo clic aquí.
Non hai moitas fotos porque tod@s estabamos máis pendentes de enfocar os telescopios cara á Lúa que de facer reportaxes :) A ver se para a próxima alguén fai de fotógraf@ oficial!

Por un ceos sen contaminación lumínica

2007-01-12T18:21:00.000+01:00

Iniciativa Internacional en Defensa da Calidade do Ceo Nocturno como Dereito Científico, Cultural e Medioambiental da Humanidade

Boas novas para quen están preocupad@s polo despilfarro de enerxía que supón a contaminación lumínica dos nosos ceos e pola perda das estrelas como parte da nosa paisaxe cotiá. Promovida pola Unesco, o Instituto de Astrofísica de Canarias, a reserva da Biosfera de La Palma, o Goberno de Canarias e o Ministerio de Medio Ambiente, o próximo mes de abril vaise lanzar a iniciativa internacional en defensa da calidade do ceo nocturno "Starlight 2007".

Toda a información en http://www.starlight2007.net/

Tal e como comentan na presentación:

"A iniciativa concíbese como unha campaña internacional en defensa da calidade dos ceos nocturnos e o dereito xeral á observación das estrelas, aberta á participación de todas as institucións e asociacións científicas, culturais e cidadás relacionadas coa defensa do firmamento.

Preténdese así reforzar a importancia que os ceos limpos teñen para a humanidade, realzando e dando a coñecer o valor que este patrimonio en perigo posúe para a ciencia, a educación, a cultura, o turismo, e evidentemente, como factor de calidade de vida. Un importante aspecto da iniciativa será, pois, axudar a difundir os beneficios directos e indirectos, tecnolóxicos, económicos o u culturais, asociados á observación das estrelas.

O lanzamento da iniciativa farase a partir da Celebración da Conferencia Internacional en Defensa da Calidade do Ceo Nocturno e o Dereito á Observación das Estrelas, a celebrar en La Palma (Illas Canarias) en Abril do 2007. Un obxectivo básico deste encontro será promover a Declaración Universal do Dereito á Luz das Estrelas, como expresión do compromiso de protección deste patrimonio común da humanidade."

Foto da Lúa dende a Praza Roxa

2006-12-12T14:32:00.000+01:00

Esta foto da Lúa sacouna James López o pasado día 29 de novembro dende a Praza Roxa cunha cámara dixital con zoom a traverso do ocular do refractor de 90mm f/11. Un bó exemplo do que se pode facer con habilidade e paciencia. A imaxe, como a maioría das que poñemos neste blog, está tal cal saíu (é o que no ámbito anglosaxón chaman unha "raw image") e non ten ningún procesado, salvo orientala correctamente. Fai clic nela para vela de maior tamaño.
Estamos á espera de poder dispor de máis espazo nos servidores para subir a reportaxe fotográfica da actividade dese día na Praza Roxa... seguiremos informando!

Observación na Praza Roxa (barrio do Ensanche)

2006-11-30T13:42:00.000+01:00

Por fin !! O tempo deunos un respiro e onte día 29 montamos os telescopios na Praza Roxa de Compostela axudados polos amigos da AsociaciónVeciñal "Raigame". Utilizamos seis telescopios de diferentes tipos e un par de postos de observación con prismáticos sobre trípode.

Os colegas do Clube Vega trouxeron a Celestino, un reflector de 20 cm feito por eles e que nos deu unhas marabillosas vistas da Lúa. Varios dos participantes sacaron fotos cos seus móbiles ou cámaras dixitais, en canto nos cheguen algunhas colgarémolas na rede.

Estivemos alí dende as 20.00 até as 01.30, e foi moita a xente que pasou a botar un ollo, consultar dúbidas ou propor ideas para actividades. Apertas para tod@s. Especialmente para unha persoa do Xapón recén chegada a Kompos que non paraba de exclamar "Oh, my God!" mentras percorría a Lúa co refractor de 90 mm e para Sandra, a máis nova e máis entusiasta do equipo de astrónom@s cos que contamos esta noite.

Se queres estar informad@ das próximas actividades ou facer calquera proposta, escríbenos un correo ao enderezo

Xuntanza de astrónom@s galeg@s

2006-11-30T13:33:00.000+01:00

O pasado sábado día 25 de novembro, no local do Clube Vega no Centro Sociocultural da Trisca (Barrio de San Pedro, Kompostela) tivo lugar unha reunión de persoas vencelladas ás diferentes asociacións astronómicas galegas para falar, entre outros temas, da creación dunha Federación. A asistencia foi numerosa e as perspectivas moi boas. Saudamos dende aquí a todas e todos os participantes nesa inciativa!

Imaxes da galaxia NGC1313 - Observatorio Europeo Austral

2006-11-24T15:25:00.000+01:00

@s colegas do Observatorio Europeo Austral (E.S.O.) infórmannos da recente publicación de novas imaxes da galaxia NGC1313, obtidas cos telescopios VLT de clase 8 metros situados en Cerro Paranal (Chile).

Esta galaxia mostra un elevado ritmo de nacemento de novas estrelas, nela prodúcense procesos altamente enerxéticos e prantexa interesantes enigmas para a investigación astronómica.

Se queres saber máis e ver as imaxes con maior resolución, bota un ollo á páxina abaixo indicada
http://www.eso.org/outreach/press-rel/pr-2006/pr-43-06.html

Pois caen chuzos de punta... Aprazamos a Mostra!

2006-11-15T15:02:00.000+01:00

Vista a que está caendo, e a predición dos nosos colegas de MeteoGalicia de que a cousa irá a peor (ver aviso )...

APRAZAMOS a Mostra de telescopios

que iamos facer hoxe na Praza Roxa até calquera día axeitado das próximas dúas semanas, que procuraremos que estea despexado e cadre ben para observar as paisaxes da Lúa.
Avisarémosvos por email e no blog da data da Mostra, e tamén das demáis actividades que se programen. E se tes algunha idea que queiras compartir, ou algunha proposta de actividade interesante, xa sabes... escribenos!

Mostra de telescopios na Praza Roxa

2006-11-13T16:40:00.000+01:00

Este mércores día 15 de novembro, a partir das 20:00 horas, celebraremos un encontro informal de afeccionados e unha mostra de telescopios na Praza Roxa do ensanche compostelán, organizada coa Asociación Veciñal "Raigame".

O obxectivo é poñer en contacto entre si ás persoas con interese por estes temas e dar a coñecer as actividades das asociacións de astronomía do entorno de Compostela. "Astronomía na beirarrúa" convídavos a participar e levar os vosos propios telescopios ou prismáticos, para resolver as dúbidas que teñades sobre o seu funcionamento e axudarvos a tirar o máximo partido deles.

A día de hoxe as condicións meteorolóxicas previstas para a tardiña do mércores non son as mellores do mundo, pois probábelmente entrará unha borrasca :( (máis detalles en MeteoGalicia). Se chove pouco manteremos igual a actividade; se caen chuzos de punta estudiaremos aprazala. Se queres estar informad@ das novas de última hora, envíanos un email a ver enderezo (se xa estás na nosa lista de correo e recibes habitualmente as nosas informacións non necesitas facelo de novo).

Se queres baixar unha copia do cartel en formato A3 fai clic aqui

E a noite foi unha festa...

2006-11-10T18:14:00.000+01:00

Tiñamos pensado quedar até as 22.30 pero recollimos á 1 da mañá. As Pléiades e a Lúa estaban impresionantes. E impresionadas quedaron as persoas que compartiron con nós esta actividade. Algunhas delas era a primeira vez que vían "de cerca" os cráteres e os mares lunares, ou o acio de pequenos diamantes que é o cúmulo estelar aberto das Pléiades... Outras descobriron que, cunha cámara dixital normal ou coa cámara dun móbil se poden sacar boas fotos a traverso dun telescopio.

Queres ver as fotos desta noite? fai clic en

Fotos da noite en San Pedro

E o próximo mércores, día 15, a partir das 20.00h se o tempo non o impide... encontro de persoas aficionadas á astronomía e telescopios na Praza Roxa coorganizada coa Asociación Veciñal Raigame, do barrio do Ensanche compostelán. Agardámoste e convida a quen queiras!

Observación no barrio de San Pedro

2006-11-09T13:59:00.000+01:00

Hoxe xoves día 9, a partir das 20.30 h (e polo menos até as 22.30) estaremos na Porta do Camiño, o lugar onde o Barrio de San Pedro se xunta coa Cidade Vella, para observar o ceo. Estades convidados!. Agradecemos o apoio da Asociación Veciñal A Xuntanza, sempre activa para facer deste barrio un lugar interesante para vivir.

Na imaxe tedes os obxectos que -se non hai nubes- poderemos observar en dirección Leste. Fai clic nela para vela aumentada.

As luces da cidade farán que o ceo non se vexa tan ben como nesta predición: é o problema que se chama "contaminación lumínica". Demasiada luz do sistema de alumeado público vai cara arriba facendo brillar o aire e diminuindo os contrastes. Non só é un derroche inútil de enerxía. A contaminación lumínica prívanos de ver o ceo cada noite. Moitos e moitas de vós quedaríades pampos vendo centos de estrelas nunha noite clara lonxe das luces da cidade. Pois todas esas estrelas están aquí, cada noite, sobre Compostela. As luces (e moitas veces as nubes tamén, claro :) nos impiden velas. Apoia as iniciativas para conseguir sistemas de alumeado público que non contaminen!

Participa na SEMANA DA CIENCIA !

2006-11-05T14:58:00.000+01:00

Este luns día 6 comeza a Semana da Ciencia, que durará até o 19 de novembro. Si... é a única semana do ano que dura case quince días :) e está chea de actividades interesantes en diferentes cidades e vilas de Galicia. Se queres ver o programa, visita a web Semana da Ciencia. Participa nelas: paga a pena!

Astronomía na beirarrúa forma parte das iniciativas desta Semana. Dentro delas, convidámosvos á reunión que imos facer este mércores día 8, a partir das 19.00 h, na Aula 4 da Facultade de Física da USC, na que
(1) Presentaremos os novos telescopios cos que contamos para as observacións
(2) Comentaremos o calendario previsto de observacións na rúa, nas que vos animamos a participar
(3) Informaremos doutras actividades da Semana da Ciencia
(4) Falaremos de propostas para facer durante o resto do curso (as ideas son benvidas!)

A reunión é aberta. Se coñeces a alguén a quen lle interese, convída@ a vir!

Obradoiro sobre telescopios e software libre para astronomía

2006-10-30T21:48:00.000+01:00

Queres aprender a usar un telescopio?

2006-10-21T17:30:00.000+02:00

Se queres aprender a usar un telescopio ou uns prismáticos (ou queres mellorar o que xa sabes e sacarlles o máximo partido) convidámoste a vir o mércores 25 de outubro ao

Obradoiro sobre manexo de telescopios e software libre para astronomía

que imos celebrar na Facultade de Física da Universidade de Santiago de Compostela. Estaremos na Aula 8 (primeiro andar) dende as 18.00 até as 21.00. Podes pasarte por alí cando queiras. Se tes telescopio, podes traelo; se non, nós temos varios cos que podes practicar libremente. Es benvid@!

Se queres máis información, escríbenos un email (contacta con nós)

A Estación Espacial non fallou á cita

2006-07-03T15:51:00.000+02:00

Tal como estaba previsto, a iso das 00.40 do sábado (1 de xullo), a Estación Espacial Internacional (ISS) sobrevoou Galicia deixándose ver polo barrio de San Pedro. Mágoa que a capa de nubes altas que había non permitisen vela con todo o seu brillo; pero puidemos albiscar perfectamente como ascendía no ceo dende o horizonte noroeste até desaparecer, ao entrar na sombra da Terra, cando estaba a gran altura perto das estrelas da Osa Maior. Non sabemos se as persoas da tripulación se decataron dos saúdos que lles mandamos... a próxima vez levaremos linternas :)
Agora mesmo están na ISS Pavel Vinogradov e Jeff Williams. O primeiro astronauta do Brasil, Marcos Pontes, regresou á Terra o pasado 8 de abril; en días próximos unirase á tripulación da ISS Thomas Reiter.
Se queres saber máis sobre que é e que fai a ISS podes ir á web da Axencia Espacial Europea. Se queres saber cando e como vela nos próximos días, visita a web Heavens-above. Non se ve todos os días, nen ás mesmas horas, nen na mesma dirección, nen co mesmo brillo. É un espectáculo novo cada vez.

2006-07-03T15:44:00.000+02:00

Fer enviounos a chave coas estrelas que aparecen na bandeira do Basil... para quen tiñades problemas para vela correctamente aí vos vai de novo. Clic na imaxe para vela ampliada.

2006-07-03T15:41:00.000+02:00

Por certo, falando de Brasil... na súa bandeira ten 27 estrelas. Ademáis da Cruz do Sur, que se recoñece a primeira vista, ten alguén idea de cales son as outras? Podes facer clic na imaxe para vela ampliada.

Observación na Rúa de San Pedro

2006-06-27T17:37:00.000+02:00

O venres 30 de xuño, se non caen chuzos, estaremos na Rúa de San Pedro de Santiago de Compostela -na praza que hai diante da igrexa- a partir das 21.30 para montar telescopios e observar o ceo. A Lúa, Xúpiter e un paso especial da Estación Espacial Internacional (ISS) por riba do barrio están dentro do programa. O barrio está en festas estes días e esta é unha actividade máis da ampla oferta que este ano preparou a Comisión. Se queres ver o interesante programa das festas preme aqui. Tes telescopio ou prismáticos na casa? queres saber que se pode ver no ceo de verán dende a túa rúa? Participa con nós!